ကျားပိုက်လုပ်ငန်းရှင်က မောင်မြတ်သူရထွန်းအား လျော်ကြေး ၃ သိန်းပေးခဲ့ရာ မိသားစုကလက်မခံခဲ့ဟု ဆို

ကျားပိုက်လုပ်ငန်းရှင်က ဒဂုံတက္ကသိုလ်မှနောက်ဆုံးနှစ်ကျောင်းသားမောင်မြတ်သူရထွန်းအား လျော်ကြေးငွေ ၃ သိန်းပေးရာတွင် မိသားစုမှ လက်မခံခဲ့ကြောင်း မြန်မာနိုင်ငံလူ့အခွင့်အရေးကော်မရှင်ထံမှ သိရသည်။

ကျားပိုက်လုပ်ငန်းရှင်က မောင်မြတ်သူရထွန်းအား လျော်ကြေး ၃ သိန်းပေးခဲ့ရာ မိသားစုကလက်မခံခဲ့ဟု ဆို 

ကျားဖောင်ပေါ်သို့ လူကုန်ကူးခံခဲ့ရပြီး ညှင်းပန်းနှိပ်စက်ခြင်းခံခဲ့ရသည့် ဒဂုံတက္ကသိုလ်ကျောင်းသား မောင်မြတ်သူရထွန်း၏ နေအိမ်တွင် ကာယကံရှင်အား မြန်မာနိုင်ငံလူ့အခွင့်အရေးကော်မရှင်က ပြီးခဲ့သည့် နိုဝင်ဘာလ ၂၈ ရက်တွင် သွားရောက်မေးမြန်းခဲ့ရာတွင် သိရှိခဲ့ခြင်းဖြစ်ကြောင်း သိရသည်။

“လက်ရှိကတော့ ဆေးကုသမှုခံယူနေတယ်။ ကွဲသွားတဲ့နားကတော့ ပြန်ချုပ်ထားရတယ်။ မျက်နှာက ဖူးရောင်နေတာ။ အရောင်ကနည်းနည်းပဲကျသေးတယ်။ ပြီးတော့ ကျိုးထားတဲ့လက်က ကျောက်ပတ်တီး စည်းထားရတယ်။ ဒဏ်ရာကရထားတာများတော့ အတွင်းကြေတွေဖြစ်နေတယ်။ ကိုက်ခဲ/နာကျင် ပျောက်ဆေးတွေ သောက်နေရတယ်။ သူတို့ကို ကျားပိုက်လုပ်ငန်းရှင်က လျော်ကြေးငွေ ၃ သိန်း ပေးတယ်ပြောတယ်။ သူတို့ကတော့လက်မခံဘူး။ ငြင်းလိုက်တယ်”ဟု မြန်မာနိုင်ငံလူ့အခွင့်အရေးကော်မရှင်မှ အတွင်းရေးမှူး ဦးဘုန်းကြွယ်က ပြောသည်။

မောင်မြတ်သူရထွန်းသည် နှိပ်စက်ခံထားရသည့်ဒဏ်ရာများကြောင့် မြောက်ဥက္ကလာပဆေးရုံတွင် ပြင်ပလူနာအဖြစ် ကုသမှုခံယူနေရဆဲဖြစ်ကြောင်းလည်း သိရသည်။မြန်မာနိုင်ငံလူ့အခွင့်အရေးကော်မရှင်အနေဖြင့် အဆိုပါဖြစ်စဉ်မျိုး ပြီးခဲ့သည့် ၂၀၁၈ ခုနှစ်တွင်လည်း တိုင်စာများ လက်ခံရရှိခဲ့ကြောင်း သိရသည်။ထို့ကြောင့် မြန်မာနိုင်ငံလူ့အခွင့်အရေးကော်မရှင်အနေဖြင့် လာမည့် ဒီဇင်ဘာလ ၂ ရက်တွင် ယင်းလုပ်ငန်း လုပ်ကိုင်သည့်ဒေသများသို့ သွားရောက်စစ်ဆေးမည်ဖြစ်ကြောင်း သိရသည်။