မုံရွာမြို့ ဝန်ထမ်းအိမ်ရာ အခန်း ၁၂၀ ကို နိုင်ငံ့ဝန်ထမ်းများအတွက် မဲနှိုက်ချပေး

စစ်ကိုင်းတိုင်းဒေသကြီး မြို့ပြနှင့် အိမ်ရာဖွံ့ဖြိုးရေးဦးစီးဌာနက နိုင်ငံ့ဝန်ထမ်းများအတွက် ဝန်ထမ်း အိမ်ရာ သုံးလုံးရှိ အခန်း ၁၂၀ ကို မေ ၁၆ ရက် နံနက်ပိုင်းကစတင် မဲနှိုက် ချထားပေးလျက်ရှိကြောင်း စစ်ကိုင်းတိုင်းဒေသကြီး မြို့ပြနှင့် အိမ်ရာဖွံ့ဖြိုးရေးဦးစီးဌာန ညွှန်ကြားရေးမှူး ဦးစိန်ဝင်းထံမှ သိရသည်။

“ဆောက်လုပ်ရေးဝန်ကြီးဌာန မြို့ပြနှင့်အိမ်ရာဖွံ့ဖြိုးရေးဦးစီးဌာန (ရုံးချုပ်) နေပြည်တော်က လှည့်ပတ် ရန်ပုံငွေ နဲ့တည်ဆောက်ထားတဲ့ မုံရွာမြို့ နန္ဒဝန်အိမ်ရာအပိုင်း (၂) ရှိ ရှစ်ခန်းတွဲ ငါးထပ် အဆောက်အအုံ သုံးလုံး၊ တိုက်အမှတ်(၂၊၃၊၅၊) ရှိ အခန်း (၁၂၀)ကို (၂၀၁၉-၂၀၂၀) ဘဏ္ဍာနှစ်မှာ တိုင်းအစိုးရအဖွဲ့ရဲ့ ခွင့်ပြုရန်ပုံငွေ နဲ့ စစ်ကိုင်းတိုင်းဒေသကြီး မြို့ပြနဲ့ အိမ်ရာဖွံ့ဖြိုးရေး ဦးစီးဌာနက ဝယ်ပြီးနေရေးအခက်အခဲရှိတဲ့ နိုင်ငံ့ဝန်ထမ်းတွေ နေထိုင်ရေးအဆင်ပြေစေဖို့ စိတ်အေးချမ်းသာစွာ တာဝန်ထမ်းဆောင် နိုင်ဖို့အတွက် မေ ၁၆ ရက် နံနက်ပိုင်း ကစပြီး တိုင်းမြို့ပြနဲ့အိမ်ရာဖွံ့ဖြိုးရေးဦးစီးဌာနရုံးမှာ မဲနှိုက် ချထားပေးခဲ့ပါတယ်”ဟု ဦးစိန်ဝင်းက ပြောသည်။

စစ်ကိုင်းတိုင်းဒေသကြီး အစိုးရ အဖွဲ့ရုံးစိုက်ရာ မုံရွာမြို့ရှိ တိုင်း၊ ခရိုင်၊ မြို့နယ်ရုံးများနှင့် အခြားမြို့များတွင် တာဝန်ထမ်းဆောင်လျက်ရှိသော နိုင်ငံ့ဝန်ထမ်း၏ နေရေးအခက်အခဲများကို ဖြည့်ဆည်းဆောင်ရွက်ပေးနိုင်ရန် ရည်ရွယ်ချက်ဖြင့် စစ်ကိုင်းတိုင်းအစိုးရ အဖွဲ့ထံ ဘဏ္ဍာနှစ်အလိုက် ခွင့်ပြုရန်ပုံငွေ တောင်းခံပြီး ဝန်ထမ်းအိမ်ရာများ တည်ဆောက်ပေးလျက်ရှိရာတွင် ၂၀၁၈-၂၀၁၉ ဘဏ္ဍာနှစ်အထိ မြို့ ပေါင်း ၃၉ မြို့တွင် ဝန်ထမ်းအိမ်ရာ အဆောက်အအုံ ၁၉၉ လုံးနှင့် အခန်းပေါင်း ၂၅၂၆ အား တည်ဆောက်၍ နေရာချထားပေးခဲ့သည်။

ထို့ပြင် ယခု ၂၀၁၉-၂၀၂၀ ဘဏ္ဍာ နှစ်တွင် စစ်ကိုင်းတိုင်းဒေသကြီး အတွင်းရှိ မြို့ပေါင်း ၁၂ မြို့တွင် ဝန်ထမ်းအိမ်ရာ ၁၄ လုံး ထပ်မံ တည်ဆောက်နေပြီဖြစ်ကြောင်း စစ်ကိုင်းတိုင်းဒေသကြီး မြို့ပြနှင့် အိမ်ရာ ဖွံ့ဖြိုးရေးဦးစီးဌာနမှ သိရသည်။

“မုံရွာမြို့အနေနဲ့ ဝန်ထမ်းအိမ်ရာ လိုအပ်ချက်အရ မြို့ပြနှင့်အိမ်ရာဖွံ့ဖြိုး ရေးဦးစီးဌာနက အိမ်ခန်းပေါင်း ၄၇၂ ခန်း နေရာချထားပေးပြီး ဖြစ်သလို၊ အခုဘဏ္ဍာနှစ်အထိ ဌာနသို့ အိမ်ခန်း လျှောက်ထားတဲ့ဦးရေ ၃၀၈ ဦးရှိပြီး အခန်းပေါင်း ၁၂၀ ကိုသာ နေရာချ ထားပေးနိုင်ခဲ့တဲ့အတွက် နေရေး လိုအပ်ချက်ရှိနေသေးတဲ့ လျှောက်ထားသူ ဦးရေ ၁၈၀ ကျော်ကိုလည်း လာမယ့်ဘဏ္ဍာနှစ်တွေမှာ ဆက်လက်နေရာ ချထားပေးနိုင်ဖို့ တိုင်းအစိုးရအဖွဲ့ကို တင်ပြပြီး ဆောင်ရွက်မှာဖြစ်ပါတယ်” ဟု ၎င်းကပြောသည်။

စစ်ကိုင်းတိုင်းဒေသကြီး အစိုးရအဖွဲ့၏ အစီအစဉ်ဖြင့် ၂၀၁၉-၂၀၂၀ ဘဏ္ဍာနှစ်တွင် စစ်ကိုင်းတိုင်းဒေသကြီး မုံရွာ၊ စစ်ကိုင်း၊ ကလေး၊ တမူးနှင့် ကသာစသည့် မြို့ ငါး မြို့တွင် ပြည်သူ့ အငှား အိမ်ရာ ငါးလုံး၊ အခန်းပေါင်း ၁၉၀ ခန်း တည်ဆောက်နေပြီဖြစ်၍ လုပ်သက် (၂၅) နှစ်အထက် ကိုယ်ပိုင် အိမ်ရာမရှိသော နိုင်ငံ့ဝန်ထမ်းများ၊ ကိုယ်ပိုင်အိမ်မရှိသော အငြိမ်းစား ဝန်ထမ်းများ၊ ဝင်ငွေနည်းပြည်သူများအား အချိုးကျခွဲဝေ၍ နေရာချထားပေးမည်ဖြစ်ကြောင်း သိရသည်။

ယခင်ဘဏ္ဍာနှစ်များကလည်း မုံရွာ၊ စစ်ကိုင်း၊ ကလေး၊ တမူးနှင့် ကသာစသည့် မြို့ ငါးမြို့တွင် ပြည်သူ့ အငှား အိမ်ရာ ၁၄ လုံး၊ အခန်းပေါင်း ၆၇၂ ခန်းကို တည်ဆောက်၍ နေရာချ ထားပေးခဲ့ပြီးဖြစ်ကြောင်း သိရသည်။

မြန်မာတိုင်းမ်