ကိုရိုနာဗိုင်းရပ်စ် အတည်ပြုလူနာသစ် မရှိတော့ကြောင်း တရုတ်ကြေညာ၊ ကမ္ဘာတလွှား ကူးစက်မှု ဆက်လက်မြင့်တက်

ကိုရိုနာဗိုင်းရပ်စ် ကပ်ရောဂါ စတင်ခဲ့တဲ့ တရုတ်နိုင်ငံမှာ ပထမဆုံးအကြိမ်အဖြစ် သောကြာနေ့က နောက်ထပ်ကူးစက်ခံရသူ လုံးဝမတွေ့ရဘူးလို့ NHC တရုတ် ကျန်းမာရေးကော်မရှင်က စနေနေ့မှာ ပြောပါတယ်။ကြာသပတေးနေ့ကနေ သောကြာနေ့အတွင်း ကူးစက်ခံရသူ ၄ ဦးကနေ လုံးဝ မတွေ့ရတော့တဲ့အထိ ကူးစက်ခံရမှု ကျဆင်းခဲ့တာဖြစ်ကြောင်း တရုတ် ကျန်းမာရေး ကော်မရှင်က ပြောဆိုခဲ့တာပါ။

တရုတ်မှာ ကိုရိုနာဗိုင်းရပ်စ်ကြောင့် သေဆုံးသူ ၄,၆၀၀ ကျော်ရှိပြီး ကူးစက်ခံ အတည်ပြုလူနာ ၈၃,၀၀၀ နီးပါးရှိကြောင်း တရုတ်အစိုးရ တရားဝင်စာရင်းတွေက ဖော်ပြပါတယ်။ခရီးသွားကန့်သတ်မှုတွေ ချမှတ်ခဲ့တဲ့နောက် တရုတ်နိုင်ငံမှာ မတ်လကစပြီး ရောဂါကူးစက်ခံရသူ အရေတွက် သိသိသာသာ ကျဆင်းသွားတာ ဖြစ်ပါတယ်။

ကမ္ဘာတလွှားမှာတော့ စနေနေ့အထိဆိုရင် ဒီရောဂါ ကူးစက်ခံရသူ ၅.၂ သန်းကျော် ရှိပြီး သေဆုံးရသူက ၃ သိန်း ၄ သောင်းလောက် ရှိနေပါပြီ။ကမ္ဘာ့နိုင်ငံတွေဟာ ဒီကပ်ရောဂါ ပြန့်ပွားမှုမရှိအောင် လုံးပန်းနေရတာနဲ့ တချိန်တည်းမှာပဲ စီးပွားရေး ပြန်လည်ပတ်ဖို့ပါ ကြိုးစားနေရတာပါ။မွတ်စလင်တွေအတွက် ဘာသာရေးအရ အရေးပါတဲ့ Ramadan ဥပုသ်လအပြီး ကျင်းပတဲ့ အိဒ်ပွဲတော်ကို လွတ်လွတ်လပ်လပ် မကျင်းပနိုင်ကြသလို အမေရိကန်နိုင်ငံမှာလည်း နွေရာသီအားလပ်ရက် စတင်တဲ့ Memorial Day အောက်မေ့ဖွယ်နေ့ဟာ တနင်္လာနေ့မှာ စတင်မှာဖြစ်ပေမယ့် အရင်လို မဆင်နွှဲနိုင်ကြပါဘူး။

အမေရိကန်နိုင်ငံမှာ လူပေါင်း ၁.၆ သန်းကျော် ဒီရောဂါ ကူးစက်ခံရပြီး ကမ္ဘာမှာ အများဆုံးဖြစ်နေပေမယ့် ရောဂါမကူးစက်အောင် ချမှတ်ထားတဲ့ ကန့်သတ်မှုတွေကို ပိုပြီး ဖြေလျှော့ပေးဖို့ ပြည်နယ်အုပ်ချုပ်ရေးမှူးတွေကို သမ္မတ Donald Trump က တိုက်တွန်းနေတာပါ။ရုရှားနိုင်ငံကတော့ ကမ္ဘာမှာ ကူးစက်ခံရမှု ဒုတိယအများဆုံး ဖြစ်နေပြီး တတိယအများဆုံး ကူးစက်ခံရတာက ဘရာဇီးနိုင်ငံ ဖြစ်ပါတယ်။

အိန္ဒိယနိုင်ငံမှာတော့ ဒီရောဂါ မပြန့်ပွားအောင် ၂ လကြာ အသွားအလာ ပိတ်ပင်ထားရာကနေ ဖွင့်ပေးလိုက်ပြီးတဲ့နောက် ကူးစက်ခံရသူ အရေအတွက် တိုးလာနေပြီး သောကြာနဲ့ စနေနေ့တွေမှာ တနေ့ကို ၆၀၀၀ ကျော်နဲ့ ကူးစက်မှုအများဆုံးနေ့တွေ ရှိလာနေပါတယ်။

ဗွီအိုအေ