တရုတ်နိုင်ငံထုတ် COVID-19 ကာကွယ်ဆေး လူတွေကို ထိုးနှံစမ်းသပ်မှု ယူအေအီးမှာ ပြုလုပ်မည်

တရုတ်မှာ စမ်းသပ်ရန် လုံလောက်တဲ့ COVID-19 လူနာသစ် အရေအတွက် မရှိတာကြောင့် ဖြစ်ပါတယ်။တရုတ်နိုင်ငံထုတ် COVID-19 ကာကွယ်ဆေးကို လူအများအပြားမှာ တတိယအဆင့် စမ်းသပ်မှုအား အာရပ်စော်ဘွားများပြည်ထောင်စု (United Arab Emirates – UAE/ယူအေအီး) နိုင်ငံမှာ ပြုလုပ်ခွင့်ရရှိခဲ့ကြောင်း သိရပါတယ်။

ကာကွယ်ဆေးစမ်းသပ်မှု တတိယအဆင့်ကို ယူအေအီးမှာ ပြုလုပ်ခွင့်ရရှိခဲ့ကြောင်း China National Biotec Group (CNBG) ကုမ္ပဏီက ဇွန် ၂၃ ရက်မှာ ပြောခဲ့ပါတယ်။ တရုတ်နိုင်ငံက ကာကွယ်ဆေးကို ပြည်တွင်းမှာ စမ်းသပ်ရန်အတွက် လုံလောက်တဲ့ COVID-19 လူနာအသစ် အရေအတွက် မရှိတာကြောင့် ပြည်ပနိုင်ငံတစ်နိုင်ငံမှာ စမ်းသပ်ရန် စီစဉ်နေခဲ့တာလည်း ဖြစ်ပါတယ်။

ကမ္ဘာတစ်ဝှမ်းမှာ COVID-19 ကာကွယ်ဆေး တစ်ဒါဇင်ကျော်ကို လူတွေမှာ စမ်းသပ်မှုတွေ လုပ်ဆောင်နေပေမဲ့ လက်ရှိအချိန်အထိ တတိယအဆင့် (Phase 3) စမ်းသပ်မှုကို အောင်မြင်ခဲ့ပြီးတဲ့ ကာကွယ်ဆေးမရှိသေးပါဘူး။ တတိယအဆင့် စမ်းသပ်မှုဟာ ကာကွယ်ဆေးက ကျန်းမာတဲ့လူတွေကို COVID-19 ဖြစ်စေတဲ့ ကိုရိုနာဗိုင်းရပ်စ် (SARS-CoV-2) ကနေ ထိရောက်စွာ ကာကွယ်ပေးနိုင်ခြင်းရှိ မရှိ ဆုံးဖြတ်သိရှိရန် ဖြစ်ပါတယ်။

အဆိုပါ စမ်းသပ်မှုကို ပုံမှန်အားဖြင့် COVID-19 ကူးစက်မှု ကျယ်ကျယ်ပြန့်ပြန့် ဖြစ်ပွားနေတဲ့ နိုင်ငံတွေမှာ လူဦးရေ ထောင်နဲ့ချီ ပါဝင်စမ်းသပ်ခံရပါတယ်။ သို့သော် တရုတ်နိုင်ငံမှာ ပြီးခဲ့တဲ့လအတွင်း နေ့စဉ် COVID-19 ကူးစက်ခံရသူ အသစ်တွေ့ရှိမှုဟာ ပျမ်းမျှအားဖြင့် ၁၀ ဦးအောက် အရေအတွက် ဖြစ်နေခဲ့တာကြောင့် တာဝန်ရှိသူတွေက ပြည်ပမှာ စမ်းသပ်ရန် စီစဉ်ခဲ့တာဖြစ်ကြောင်း သိရပါတယ်။

ယခုအခါမှာတော့ ယူအေအီးနိုင်ငံမှာ ၎င်းတို့ရဲ့ ကာကွယ်ဆေးကို တတိယအဆင့် စမ်းသပ်မှုပြုလုပ်ခွင့်ရရှိခဲ့ပြီလို့ CNBG က Weibo အကောင့်မှာ ကြေညာခဲ့ပါတယ်။ ယူအေအီးမှာ စမ်းသပ်သွားမယ့် COVID-19 ကာကွယ်ဆေးအမည်ကိုတော့ CNBG က ထုတ်ဖော်ပြောထားခြင်း မရှိပါဘူး။

CNBG ကုမ္ပဏီဟာ တရုတ်အစိုးရပိုင် China National Pharmaceutical Group (Sinopharm) နဲ့ ပူးပေါင်းပြီး COVID-19 ကာကွယ်ဆေး နှစ်မျိုးကို ထုတ်လုပ်နေခဲ့ပါတယ်။ ၎င်းတို့ရဲ့ ကာကွယ်ဆေးကို တရုတ်နိုင်ငံမှာ ယခင်က လူ ၂,၀၀၀ ကျော်အား ထိုးနှံစမ်းသပ်ထားခဲ့ကြောင်းလည်း သိရပါတယ်။ အခြား တရုတ်ကုမ္ပဏီတွေကလည်း ပြည်ပနိုင်ငံတွေမှာ ကာကွယ်ဆေးစမ်းသပ်မှုတွေ လုပ်ဆောင်ခွင့်ရရှိရန် စီစဉ်နေကြတယ်လို့ ဆိုပါတယ်။

၎င်းတို့အနက် Biopharmaceuticals က ထုတ်လုပ်ထားတဲ့ COVID-19 ကာကွယ်ဆေးကို ဩစတြေးလျမှာ အစောပိုင်း လေ့လာမှုအတွက် စမ်းသပ်ထားပါတယ်။ ထို့အတူ Sinovac Biotech ရဲ့ ကာကွယ်ဆေးကိုလည်း တတိယအဆင့် စမ်းသပ်မှုအဖြစ် ဘရာဇီးနိုင်ငံမှာ ၎င်းတို့ သဘောဆန္ဒအလျောက် ပါဝင်စမ်းသပ်ခံမယ့် လူဦးရေ ၉,၀၀၀ အား ထိုးနှံစမ်းသပ်မှု စတင်သွားရန် မျှော်လင့်ထားကြောင်း Reuters သတင်းက ဖော်ပြပါတယ်။

ယမန်နှစ် ဒီဇင်ဘာလကုန်က တရုတ်အလယ်ပိုင်း ဝူဟန်မြို့မှာ စတင်တွေ့ရတဲ့ COVID-19 ကို ကမ္ဘာလုံးဆိုင်ရာ ကူးစက်မြန် ကပ်ရောဂါအဖြစ် ကမ္ဘာ့ကျန်းမာရေးအဖွဲ့အစည်း (World Health Organization – WHO) က မတ်လ ၁၁ ရက်မှာ သတ်မှတ်ကြေညာခဲ့ပါတယ်။ လက်ရှိအချိန်အထိ ကမ္ဘာတစ်ဝှမ်းမှာ COVID-19 ကူးစက်ခံရသူ ၉.၃ သန်းကျော်၊ သေဆုံးသူ ၄၈၀,၀၀၀ ကျော်နဲ့ ပြန်လည်သက်သာသူ ၅ သန်းကျော်ရှိခဲ့ပါတယ်။

ဓူဝံ